Улсын буюу төрийн тахилгат орон нутгийн овог отгийн, хот айлын тахилга шүтлэгг уул ус гэх мэтээр өөр өөр байдаг.
Төрийн тахилгат уулсаас хамгийн эрт дээр үеэс тахиж тайж ирсэн нь Богдхан уул. Хүннүгийн үеэс төрийн хэмжээнд тахиж шүтэж байсан гэх мэдээ бий. Хожим Их Монгол Улсын үед тахиж шүтэж байжээ. Харин 1709 онд "Халх журам" хууль цаазын бичигт Богдхан уулыг тахилгат уул хэмээн хуульчилсан байна. 1778 онд хүрээ сайд Юндэндоржийн өргөн мэдүүлсний дагуу Богдхан уулсыг дархан цаазтай болгох хааны зарлиг гарснаар энэ уулыг жил бүр тахих болжээ. Хэдийгээр эртний ийм түүхтэй ч хуучин нийгмийн тогтолцооны үед ихээхэн алдагджээ. Харин 1995 онд Монгол Улсын Ерөнхийлөгчийн зарлиг гарч Богдхан уулыг дахин төрийн тахилгатай болгосон. Түүнээс хойш Богдхан уулын тахилга гурван удаа болсон байна.