Apple компани 2024 оноос эхлэн зөөврийн бүтээгдэхүүнүүддээ өөрийн брэндийн дэлгэцийг ашигладаг болох тухай Блүүмбэрг агентлаг мэдээлжээ.

Одоо тус компани бүтээгдэхүүнүүдийнхээ дэлгэцийг бараг зуун хувь Samsung, LG зэрэг компаниудаас авдаг юм.

Эхний ээлжид Apple компани 2024 оны сүүлээр өөрийн бүтээсэн microLED дэлгэцтэй Apple Watch Ultra ухаалаг бугуйн цагийг зах зээлд гаргахаар төлөвлөж буйг эх сурвалж мэдээлжээ.

Дараа нь iPhone болон бусад бүтээгдэхүүндээ мөн ийм өөрчлөлт хийх гэнэ.

Мэдээж дэлгэцийн үйлдвэрлэлийг өөр компанид захиалах ба дизайн, хийц технологийг нь Apple өөрөө зохион бүтээх юм байна.

Apple компани бүтээгдэхүүнүүдээ өөрийн эд ангиудаар тоноглодог болох шилжилтийг алхам алхмаар хийсээр байгаа.

Тухайлбал одоо тус компани өөрийн зохион бүтээсэн A болон M серийн чипүүдийг iPhone, iPad, Mac бүтээгдэхүүнүүддээ ашиглаж, бас модем, утасгүй холбооны чипүүдийг бүтээдэг болсноор Intel Qualcomm, Boradcom зэрэг хагас дамжуулагч үйлдвэрлэгчдээс хамааралгүй болж эхэлсэн юм.

Одоо Apple компани өөрийн бүтээсэн microLED дэлгэцийг Apple Watch дээр туршиж байгаа ба өнгөний ялгарал, дүрсийн тодрол, харагдах өнцөг зэрэг нь бусад үйлдвэрлэгчдийнхээс эрс сайжирсан тухай Блүүмбэрг мэдээлжээ.

Чанарыг нь Блүүмбэрг тодорхойлохдоо “шилэн дээр зураг зурсан мэт харагддаг” гэж магтсан байна.

Apple анх өөрийн дэлгэцийг ашиглаж эхлэх хугацааг 2020 онд гэж төлөвлөж байсан ч технологийн зарим сайжруулалт хийх шаардлагаар хойшилсон гэнэ.

Тус компани өөрийн дэлгэцтэй болох төслийг “маш чухал” ангилалд оруулж, олон тэрбумыг зарцуулаад буй тухай Блүүмбэрг мэдээлжээ.

 

Эх сурвалж: Bloomberg