Нийслэлийн Засаг даргын А/1176 дугаар захирамжийн дагуу 8-р сарын 27-ны өдрөөс 9-р сарын 16-ны 20:00 цагийг дуустал тээврийн хэрэгсэл улсын дугаарын тэгш, сондгойгоор замын хөдөлгөөнд оролцож байсан. 

Харин 9-р сарын 17-ны өдрөөс эхлэн хуучин хязгаарлалтын дагуу тээврийн хэрэгслүүд хөдөлгөөнд оролцож эхэлсэн.
Тодруулбал:

• 1, 6-аар төгссөн дугаартай машинууд Даваа гараг
• 2, 7-оор төгссөн дугаартай бол Мягмар гараг
• 3, 8-аар төгссөн дугаартай бол Лхагва гараг
• 4, 9-өөр төгссөн дугаартай бол Пүрэв гараг
• 5, 0-ээр төгссөн дугаартай бол Баасан гарагт 08:00-20:00 цагийн хооронд хөдөлгөөнд оролцохгүй.

Бүх нийтийн амралтын өдрүүдэд дугаарын хязгаарлалт үйлчлэхгүй.

Дугаарын хязгаарын бүс:

• 32-ын тойргоос 120 мянгатын уулзвар хүртэл,
• Саппорогийн уулзвараас Чулуун овооны тойрог хүртэлх авто зам хамаарна.

Дашрамд, нийслэлийн Засаг даргын 2020 оны А/1037 дугаар захирамжаар Улаанбаатар хотын авто замын ачааллыг бууруулах цогц арга хэмжээний хүрээнд нийслэл хотод бүсчлэл тогтоож, автомашины улсын дугаарын сүүлийн оронгоор хязгаарлаж хөдөлгөөнд оролцуулах зохицуулалтыг хийсэн байдаг хэмээн Замын хөдөлгөөний удирдлагын төвөөс мэдээллээ.

Зам хаасан эсэх болон замын хөдөлгөөний дугаарын хязгаарлалтын талаарх мэдээллийг 1900-1950 лавлах 24 цагийн турш түгээж байна.