Зуны улирал, цэлмэг, нартай, дулаахан өдрүүд сайхан ч бага насны хүүхэдтэй эцэг эхчүүд, өндөр настангуудын зайлшгүй анхаарах ёстой нэг зүйл нь наршилт билээ. Цэлмэг, хурц нартай өдөр нарнаас хамгаалах малгай, шүхэр хэрэглэхгүй байх, түүнчлэн малгай өмссөн ч  удаан хугацаагаар гадаа байснаас наршилт үүсдэг. 

Наршилт гэдэг нь нарны хүчтэй төөнөсөн тусгалын нөлөөгөөр бие дулааны цохилтод орж, өөрийнхөө дулааны зохицуулгыг хийж чадахгүй болсноос үүдэж хямарч, хордлогод орохыг хэлнэ. Наршилтанд бага насны хүүхэд, настангууд илүүтэйгээр өртдөг.


Наршилтын үед илрэх шинж тэмдэг

• Дотор бачуурч нозоорох, нүд харанхуйлж, манарах
• Огиудас хүрэх, бөөлжих
• Суулгах /Наршсан хүүхдийн баасны өнгө ногоорч өөрчлөгддөг/
• Бага зэрэг халуурах
• Ходоод, гэдэсний хэвийн ажиллагаа хямардаг

Наршсан үед юу хийх вэ?

• Буцалсан усыг хөргөөж задгай саванд хийж наранд халаагаад уг усаа уух буюу толгой биеийг угааж шавших, шингэн уух
• Дээрх шинж тэмдэг илэрвэл эмчид яаралтай хандаж үзүүлж, зөвлөгөө авах
• Нарнаас хамгаалж гэртээ чийгтэй сэрүүн орчин бүрдүүлэх;
• Хэрэв халуурвал хүйтэн жинг толгой, шилэн хүзүү орчимд тавьж халуунаа бууруулах;
• Хоол унд хорихгүй учраас шим тэжээлтэй хоол идэх нь зүйтэй

Наршихаас хэрхэн урьдчилан сэргийлэх вэ?

• Наранд аль болох бага яв                               
• Нарны халхавч, нүдний шил, малгай тогтмол хэрэглэх
• Гар, хөл, хүзүү зэргээ наранд ил гаргах хэрэггүй. Учир нь зөвхөн толгойноосоо халснаар наршдаггүй. Нарны тусгалыг шууд хүлээж авч байгаа биеийн бусад хэсгүүдээр ч наршиж болно
• Наранд удаан хугацаанд байх шаардлага гарвал аль болох битүү хувцас өмсөөд толгойгоо ойр ойрхон норгох юмуу нойтон алчуур, малгай хэрэглэх
• Нярай хүүхдийг гадаа байлгахдаа сүүдрэвчинд байлгаж, мөн чийглэг сэрүүн нөхцөл бүрдүүлж өгөх
• Шингэн юм аль болох ойр ойрхон уу