Ихэнх эцэг эхчүүдийн хувьд хүүхэддээ хангалттай хэмжээний витамин, уураг, ер нь бие организмд шаардлагатай эрдэс бодисуудыг хоол хүнсээр дамжуулж өгөх нь нэн ярвигтай зүйл байдаг. Зарим хүүхэд уургийн агууламж өндөртэй бүтээгдэхүүнд дургүй, зарим нь хүнсний ногоо, жимс жимсгэний төрлийн зүйл огт идэх сонирхолгүй, бүр цаашилбал хоолны дуршилгүй байх нь бий. Тэгвэл бага насны хүүхдийн хоолны дуршлыг нэмэгдүүлж, тэжээллэг хоол хүнсийг хэрэглэж сурахад туслах дараах зөвлөгөөг танд хүргэж байна.

-Хүүхдэд энгийн зүйлсийг хүртэл төвөгшөөлгүйгээр тайлбарлаж өгч, тэднийг амьдралын өдөр тутмын үйл хэрэгт идэвхтэй оролцуулах нь чухал. Тухайлбал та дэлгүүрээс хүнсний зүйлээ цуглуулахдаа хүүхэдтэйгээ хамт явж, хоол хүнсний зүйл хүний бие организмд ямар чухал талаар, тэр дундаа ямар хүнсний бүтээгдэхүүн сайн нөлөөтэй вэ гэдгийг тайлбарлах гээд үзээрэй. Хүний бага насны дадал зуршил бүхий л амьдралын туршид үргэлжилдэг шиг эрүүл зөв хооллолтын талаар ойлголттой хүүхэд ирээдүйд ямаршуу хүн болон төлөвших нь тодорхой.

-Хоолны дуршилд эерэгээр нөлөөлөх маш энгийн өөр нэг арга бол хоол хийхээс эхлүүлээд таваглах хүртэлх процессыг хүүхдэдээ нүдээр үзүүлж, чадах зүйлийг нь тэднээр хийлгүүлэх. Өөрийн хүртэхүй, мэдрэхүйн оролцоотойгоор хийсэн зүйлийг хүүхэд илүү сониучирхаж, амтлах, идэх хүсэл бүр илүүтэй нэмэгддэг.

-Дэлхийд алдартай зоогийн газруудын хоолны порц нь бага, тэгсэн хэрнээ маш өндөр үнийн сонголттой байдгийг бид мэднэ. Гэсэн хэдий ч зорьж очиж идэх хүмүүс нэлээдгүй бий. Мэдээж энэ нь хүний харах, хүртэх мэдрэхүйн таашаалтай л холбоотой зүйл. Тэгэхээр эндээс хоолны амт чанараас гадна, хоолны харагдах байдал, хооллох орчин чухал гэдгийг ойлгож болно. Ширээгээ хөнгөхөөн гоё засаж, бага зэргийн ач холбогдол өгөхөд л хангалттай. Энэ нь хүүхдийн хоолны дуршлыг нэмэгдүүлэхэд онцгой чухал нөлөөтэй.

-Өөрөөр бага насны хүүхдийг өөрийн санаачилгаар хөргөгчинд байгаа алим жимс, хүнсний төрлийн зүйлийг аваад иднэ гэж бодож байна уу? Энэ тохиолдолд алим жимсийг идэхэд тохиромжтойгоор жижиглэх, шингэн зүйлийг мөн л гарт нь ойр, нүдэнд харагдахаар тавих шиг сайн арга гэж үгүй. Мөн жимс, жимсгэнээр хүүхдийнхээ сахарын хэрэглээг нөхөх нь чихэр шоколадны зүйлээс хол байхад нэн тустай. Бага насны хүүхэд 1.5 нас хүртлээ төрөл бүрийн амтыг мэдрэх, хүлээж авах чадвар өндөртэй байдаг. Харин дөрвөн нас хүрээд шинэ содон амтыг хүлээж авахаас төвөгшөөж эхэлдэг. Тиймээс аль болох багаас нь төрөл бүрийн хүнсний ногоо, жимс жимсгэнэ өгч хэвшээрэй.

-Нөгөө талаас нэг төрлийн хоол хүнсний зүйлийг хүүхдэд байнга өгөх нь сонирхолгүйгээс гадна витамин болон тэжээлийн дутагдалд оруулдаг. Ийм учраас бүх төрлийн хүнсний бүтээгдэхүүнийг хослуулж хэрэглэх нь чухал юм.  

Эдгээр аргыг чухалчилж, анзаараад нэг үзээрэй. Таны хүүхдийн хоолны дуршилд тодорхой нөлөө үзүүлнэ гэдэгт итгэлтэй байна. Нэг зүйлийг нэмж хэлэхэд хүүхэд гэдэг өөрөө тухайн гэр бүлийн амьдралын хэв маяг, ахуй соёлын тусгал байдаг. Тийм ч учраас аав ээж нар маань өөрсдөө эрүүл зөв хооллолтын ач тусыг ухамсарлаж, өдөр тутмынхаа амьдралд дадал, хэвшил болгохыг зөвлөж байна.